Wednesday, February 28, 2024
Other Poems

ସ୍ଵପ୍ନ

  • ସ୍ୱପ୍ନ
    —-
    (ବହୁ ବର୍ଷ ତଳେ,ବାଣୀବିହାରରେ ପଢ଼ିବା ସମୟରେ ରଚିତ କବିତା…… ବନ୍ଧୁ ମାନଙ୍କୁ ଭଲ ଲାଗିବ ବୋଲି ଆଶା)
    ===================================
    ସ୍ୱପ୍ନ ଦେଖିବାର ସ୍ୱାଧୀନତା ତୁମେ
    ଦେଇଥିଲ ଦିନେ ଯାହା,
    ଆଲୋକ ନୁହେଁ ସେ ଛାଇ ଅନ୍ଧକାର
    ସ୍ୱପ୍ନ ନାମେ ଏକ ମାୟା !

    ଛଳନା ଗୋ! ତୁମେ, କେଉଁ ହୃଦ-ରାଜ୍ୟେ
    ହେବାପାଇଁ ଅଧିଶ୍ଵରୀ,
    ଥିଲା ଯେବେ ଇଚ୍ଛା,ମିଥ୍ୟା ପ୍ରତିଶ୍ରୁତି
    ଦେଉଥିଲ କି’ବିଚାରି !

    ସେ ପ୍ରତିଶ୍ରୁତିରେ ଅରଣା ମୋ ମନ
    ଗଲା ଇନ୍ଦ୍ରଧନୁ ଖୋଜି,
    କେଉଁଠି ହଜିଲା କେଉଁ ଇଲାକାରେ
    ନପାଏ ମୁଁ ଖୋଜି ଆଜି।

    ଭରିଦେଲ ସତେ ମୋ ଆଖିରେ କେତେ
    ଆଶାର ଶିଶିର ବିନ୍ଦୁ ?
    ଲୁହ ହୋଇ ତାହା ଝରିଯାଇ,ହୃଦ
    କରିଦେଲା ଦୁଃଖ ସିନ୍ଧୁ।

    ସେ ସିନ୍ଧୁ ଗର୍ଭରେ ଆଗ୍ନେୟ ଗିରିରେ
    ଜଳୁଛି ବଡବାନଳ,
    ସତ କୁହ ତୁମେ କି ଲାଭ ପାଇଲ,
    ମୋ ସଙ୍ଗେ କରି ଏ ଛଳ !

    ଛଳନା ଗୋ ! ତୁମେ ମୋମନକୁ ଭାଙ୍ଗି
    ଗଢୁଛ ଯେ ଇମାରତ,
    ଧୂସାବାଲିରେ ସେ କଳ୍ପନା ଘରକୁ
    ରଖିବ ତ କାଳ ସ୍ରୋତ !

    (ଏହା ନିଜ ଅନୁଭୂତିର କବିତା ନୁହେଁ….ଜଣେ ପ୍ରିୟ ସହପାଠୀ ଙ୍କ ଅନୁଭୂତି ଆଧାରରେ ରଚିତ ହୋଇଥିଲା)

Click to rate this post!
[Total: 0 Average: 0]

Leave a Reply